Pages

@LeKoweit لكل من يود التعليق أو المناقشة حول المقال يسعدني ذلك عبر حسابي على التويتر

Saturday, July 24, 2010

أطفال الإشارات

ظاهرة غريبة ودخيلة على مجتمعنا منتشرة بكثرة في الأونة الأخيرة...

ظاهرة الأطفال الذين يبيعون عند إشارات المرور، هذا المشهد الذي يذكرك بإشارت المرور في القاهرة التي تمتلئ بـ"الشحّاتين" والأطفال الذين يبيعون المناديل الورقية، ولكن وجود هذا الأمر عندنا في الكويت أمر مستغرب ودخيل على مجتمعنا.




من أحد إشارات المرور في السالمية
(أعتذر على عدم وضوح الصورة، التقطتها بسرعة)




أين وزارة الداخلية عنهم؟ أو التجارة أو البلدية أو أي جهة مسؤولة ؟
تواجدهم هكذا يشكل خطر على حياتهم، ويعيق حركة المرور، وفوق هذا منظر غير حضاري أبداً !


ما رأيكم بهذا الموضوع؟
وهل لاحظتم انتشارهم بكثرة؟

40 comments:

أبوفلان said...

فعال أخوي لو كويت

ملاحظها بكثرة بحولي !!

خاصة في واحد من 4 سنوات اشوفه ما ادري شنوز جنسيته يقول اشتر مني عشان اكمل دراسة لاحول ولاقوة الا بالله

الله يرزقهم بحلاله عن حرامه

طبعا غير الناس الي بيطلعون الحين برمضان عندنا بالمساجد المشكلة كلهم نفس اللهجة وكلهم ذابحين وعليهم دية !!!!

هالظاهره فعلا تضيق الصدر لكن من كثرتهم ماتدري الصادق من الكاذب

عامر said...

ليست دخيله لو تتذكر قبل الغزو فقد كانت منتشره عند معظم الإشارات و التقاطعات

le Koweit said...

أبو فلان/

سالفة اللي يطرون بالمساجد موال ثاني هذي
فلم والله

وما قمنا ندري منو الصاج من الجذاب ... مشكلة!

حياك الله

le Koweit said...

عامر/

الحقيقة قبل الغزو ما اذكر شي :>

حياك الله

الدســتور said...

موجودين وايد
و الجهات مطنشة لان محد تكلم عنهم

الموضوع محتاج اهتمام
حرام اللي قاعدين يسوونه
بهالعمر محتاجين رعاية
لكن شتقول هذي وحدة من مشاكل البدون

حلم جميل بوطن أفضل said...

صارلها فترة و هم من فئة البدون

يبه عاقبوا أمهاتهم آبائهم قولوا عنهم مزورون أو ما شئتم .. لكن ما ذنب الأطفال ؟

قبل الغزو كان أبناء الجالية الفلسطينية يبيعون الجرائد و شدّات الكلينكس على الإشارات

شكراً على إثارة الموضوع

عين بغزي said...

سبقتني :) كنت بأكتب عن هذا الموضوع

أمر غريب و الأغرب تمر الدورية ولا تكلمهم . :)

بس أهم أضعوف ومحتاجين مساعده ولكن مو بهذي الطريقة مخالفة القانون ..!!

ROro Mania said...

انا كله اشوفهم عند اشاره شارع دمشق - التقاطع اللي ويا الرابع باتجاه جنوب السره :\
يكسرون الخاطر اليهال

و هالايام مو بس يهال
اكو هنود و مصريين خصوصا الصبح بهالشموس و الحر :\

sedrat al3eshaq said...

عوار قلب ماعبر اشوف هاليهال يبيعون ادري اهلهم السبب بس قلبي مايطاوعني اردهم مره واحد عطيته فلوس بدون ما اشتري شي قعد يترجاني اخذ الغرشه شكله ابوه او امه يراقبونه لان كان خايف

الله يرزقهم من عنده ويعطيهم على قد نيتهم جانهم صج بحاجة

alsyasya said...

صح اشوفهم وايد هالايام عند الاشارات والصراحة المنظر يعور قلبي مو عليهم على انهم مشوهين منظر الديرة جنا مو بالكويت



والطامة الكبرى انه مو بس يهال ترى

اذكر مرة كنا نازلين مركز سلطان الشويخ ولا واحد يوقفنا بسيارته ويقعد يقص لنا قصة حياته لما خلص قال ابي فلوس ابي اصب بنزين

انا واختي صارت ويوهنا جذي @@
ومو من الكويت من دول الخليج للأسف


ومرة بعد صوب جمعية الشامية كنا بالسيارة انا ويا امي جان ايي ريال كشششخه هالدشداشة والقترة والعقال ما تقول عنه طرار جان يقولنا والله انا مو من الكويت وقال اسم ديرته وهم من دول الخليج وقال انا محتاج فلوس وحدد المبلغ بعد !

انزين سفاراتكم شنو شغلها؟؟


واذا على وزارة الداخلية المفروض تشوف شغلها والمفروض علينا لما نشوف هالمناظر نعلم وترى ما يقصرون >>وحده مجربه لول

وعلى فكرة حتى لو كان في منهم الصاج المفروض ما نشجعهم ..يدورون على شغل يشتغلون اي شي ..ولا يطرون بالشوارع ويشرحون اسبابهم عشان ينكسر خاطرك وتشتري ! او اللي ما يبيع شي تعطيه

الله يعينهم ويهديهم


قواك الله

الجودي said...

مممم

من زمان أشوفهم يتخطرفون بين السيايير ظاهرة سلبية بس شنو اتقول حسبي الله على أهلهم إلي مخلينهم عرضه للموت ولا على منو ؟؟؟؟

الديرة فيها بيت زكاة وفيها جمعيات اسلاميه اشكثر خلك من هذا وين الدولة ليش ماكوا تصرف رسمي ؟؟؟

محتاجين ولا أهلهم مدمنين ولا أهما يهال قاعدين يستغلونهم شبكات شنو موضوعهم الكل يشوفهم و كاسرين خاطرنا و معترضين على شكلهم الغير حضاري إنزين وين دور الدولة أي وزارة المفروض تتحرك في شأنهم ؟؟؟


الله المستعان

Safeed said...

الفقر حالة عامة لا يمكن علاجها
لكن يمكن الحد من ظواهرها
وهناك طريقتين
إما بالفرض والاجبار والترهيب
مثل ما تطالب بتدخل البلدية والداخلية وغيرها
وإما بالمعالجة ومحاولة احتواء آثارها

بس المشكلة ان المعالجة اول خطواتها هي الاعتراف بوجود المشكلة، ومجتمعنا او عقلياتنا لا تزال ترفض
وجود (مشكلة فقر) في الكويت

!!

الزين said...

انا معاك الظاهرة كلش مو حضارية
والأطفال مالهم ذنب
بس خل نكون واقعين
يبوقون لو يبيعون عند الإشارة

تهقى لقوا حل ثاني عشان يعيشون بكرامه وما سووه

شنو اللي يحد ام او ابو يدز ولده بو ثمان سنوات يبيع عند الإشارة

:)
زمن اغبر

انت رحت عند المدارس الخاصه واللي فيها فئة كبيرة من البدون ايام الإمتحانات
شفت المحرومين من امتحان اخر السنه لأن ما يملكون ثمن القسط الأخير

ولد عمره 17 سنه
يتخرج من الثانوية
قاعد عند باب المدرسه
يبجي لأن يبي يمتحن ومو قادر
لأن ما دفع

:)

ابحث عن السبب اللي يخليهم يبيعون عند الإشارة
تالي قول ليش؟؟؟
ومنظر مو حضاري
ووين الداخلية؟؟

زكاة الكويت قاعدة تطلع بره
وعطاءاتها حق دول محتاجه شارع
ومستشفى وماني عارفه ايش

ليش ما يصير دهنا في مكبتنا ونحل مشاكل هالفئة المسكينه
لا ناخذهم باثم اهلهم اللي انكروا جنسياتهم
الأطفال ترى مالهم ذنب

اسمح لي على الإطاله
وجني شويه احتديت
بس ادري امون صح
:)

Anonymous said...

نور الكويت تقول :
تبي الصج يكسرون الخاطر خل يترزقون الله
يبطون جبدي اللي يقولون خل يمنعونهم
يعني شسوون يبوقون؟
و بكل الدول في بياعين بالشوارع و بارقى العواصم
ارحموا من في الأرض يرحمكم من في السماء

جاكليته said...

موضوعك وايد حلو..
فعلا وين الجهات الرسميه من هالظاهره ؟؟
اذا فعلا ناس تبي المساعده .. ووين اللجان الخيريه ملا تتبناهم ؟؟
انا بالاوزل كنت اعطيهم ... بس بالاخير هونت .. لاسباب كثيره ..
منها انبي ما ابي هالظاهره تزيد في دوله معروف عنها بالتقدم والعطاء للكل ..
ثانيا .. شمعنه اليهال اللي يطرون .. وين اهاليهم ..
هل هذا اسلوب لهدف ثاني غير المساعده ..؟؟
ارجوا فعلا من رجال الداخليه وضع حد لهذه الظاهره ..
يعطيمك الف عافيه على البوست المفيد :))

الحياة حلم said...

انا ضد انهم يمنعونهم يبيعون و في ناس بعد لما تشتري
تتصدق بالمرة
لان اذا امنعوهم بدرون ابواب ثانية للرزق و ممكن يترتب على هالشي مشاكل
بس اللي يضايق بالموضوع انة بعضهم يهال مستغلينهم اهلهم

Girls and Kuwait City said...

Le Koweit
وييييين اهلهم
شلون الام و الابو يقطون ضناهم بالشارع عند السياير .. باالله واحد مو بوعيه و اللا وحده عليميه يت و داسته شنوالاهم الضنى و اللا الفلس!!!!!

le Koweit said...

أبو الدستور/

الموضوع محتاج نفخة اعلامية
وراح ينحل
لو جريدة تكتب تقرير عنهم
او احد هالبرنامج يسوي تقرير عنهم راح تنحل المشكلة

حياك الله

le Koweit said...

حلم جميل/

صدقت والله الاطفال مالهم ذنب
وحرام يسوون فيهم جذي
لكن شتقول...


حياك الله

le Koweit said...

عين بغزي/

هذه بتلك :P

يمعود اهي رادة عالدورية
الدورية تشوف المخالف ما تقوله شي
تبي يكلمون هالجهال...

حياك الله

le Koweit said...

رورو مانيا/

عدل كلامج مو بس جهال
في هنود ومصاروة ومهارة يبيعون فوط
والله مرات اشوفه وانا طالع من الدوام بعز الظهر
الله يعينهم :/

حياج الله

le Koweit said...

سدرة العشاق/

صدقتي والله منظرهم يعور القلب
لكن وجودهم غلط !

حياج الله

le Koweit said...

السياسية/

مشكلة ...
على طاري السفارة
هذا واحد من الشباب يقولي سالفة عن رفيجه اللي معاه بالكلية سعودي
صارتله مشكلة مادري شنو وراح السفارة
وقال حق صاحبي هذا امش وياي بروح السفارة
يقول لما راح جاوبوه السفارة بهالجملة
(يلا الباب الباب عبالك احنا فاضين حق هالكلام)
والله صدمة يقول السعودي قلتلهم اذا انا مواطن سعودي مو شغلكم
اجل شنو شغلكم !!

ادري شطيت بس ان مرات حتى السفارات ما تساعد

الله يعينهم

حياج الله

le Koweit said...

الجودي/

المشكلة انهم منتشرين ومحد ملقيلهم بال
وبجذي راح يزيدون
وزارة الداخلية عندنا ما تمشي الا بعد ما تثار القضية بالاعلام
يعني يبيلها نفخة اعلامية ذيج الساعة يالله اتحرك الوزارة!


حياج الله

le Koweit said...

سفيد/

انا لما طالبت الوزارات والجهات المعنية بالتدخل
مو ارهاب وفرض
لا بالعكس طالبتهم بالتدخل لحل المشكلة
وكل جهة عليها جزء من المشكلة
في اجتماعية في امنية في عمل وغيره

والاعتراف بالمشكلة اول الحل
وكا اعترفنا بوجودهم :)

حياك الله

Sweet Revenge said...

فعلا موجودة وكنت قبل يومين افكر بهالاطفال ومصيرهم ومستقبلهم
بس همن ماتبيه يطر عطيه بديل مايصير نسكر كل الابواب بويه
ويمكن هذي بداية للحل
شكرا موضوع مميز

le Koweit said...

الزين/

اكبر غلط اننا نعالج الغلط بالغلط
طفل مو لاقي ياكل اوكي غلط
لكنه بهالسن ويبيع عالاشارات هذا ايضا غلط
الحمدلله بيت الزكاة موجود والله ما كثر الجمعيات الخيرية عندنا
الكويت مثل ما تعطي برا ترا هم تعطي داخل
وبدال لا يقطون عيالهم بين السيايير يبيعون
واهم اطفال ما يفهمون شي
خل يدورون على شغل ولا صدقة من الجمعيات الخيرية


واكيد تمونين افا عليج :)
لو تبي تكتبين 70 تعليق المدونة مدونتج طال عمرج :)

حياج الله

le Koweit said...

نور الكويت/

بكل الدول في هالشي اوكي بس هالشي غلط
مو معناته ان كل الدول فيها خلاص نرضى فيه
ووجودهم بهالحال وبهالمنظر اكبر غلط
المفروض طفل بهالسن ما يشتغل او يبيع
وين ابوه وين امه؟
في جمعيات خيرية في بيت زكاة !!

حياج الله

le Koweit said...

جاكليته/

على الرغم من البدليات الكثيرة بالتعليق
الا انني قدرت اخيرا وبصعوبة ان افهم شنو تبين
لووووووووووووول
اتغشمر وياج :)

كلامج عدل وهذا اللي قاعد احاول اوصله :)

حياج الله

le Koweit said...

الحياة حلم/

احنا ما صكرنا كل ابواب الرزق
اذا اهم فعلا محتاجين
في جمعيات خيرية وبيت زكاة يروحون له
واذا الواحد يبي يتصدق هم في جمعيات خيرية
السالفة ما ينفع تكون فوضى وبالشارع
غلط وراح يستغلها المحتاج والمو محتاج !

حياك الله

le Koweit said...

جيلرز اند كويت ستي/

كلامج عدل والله
بس للاسف في ناس عندهم الفلوس اهم !


حياج الله

le Koweit said...

سويت ريفينج/


مثل ما قلت حق الاخوان اللي قبلج
البديل موجود بالجمعيات الخيرية اذا كانوا فعلا محتاجين
ومو ماخذينها تسلية !

اشكرج،

حياج الله

Anonymous said...

هالسافه قديمه(خذها مني) بس إختفت
قبل كم سنه كانوا يبيعون بشارع دمشق
فعلا اليهال يكسرون الخاطر بس اللي يسوونه مو حل
وين المسؤولين مايشوفون أهل هاليهال ويعاقبونهم

le Koweit said...

تحلطم/

ممكن تكون قديمة
لكنها الحين عادت وبكثرة
وتحتاج وقفة جادة والا ستتنشر بكثرة
ولن نستطيع السيطرة عليها !


حياك الله

Anonymous said...

انا إذا شفتهم يعورني قلبي
خصوصا غذا صار واحد منهم
من عمر ولدي صج يأثرون فيني


والله يكون بعونهم لولا ظروفهم الماديه ولا ماوقفوا هالوقفه جان لقيتهم يلعبون في بيتهم ولا داخلين نادي يقضون وقت فراغهم

الله يرزقهم الرزق الحلال يااااارب

le Koweit said...

لوير/

انا معاج والله يسكرون الخاطر
بس وقفتهم بالشوارع جذي مو احل ابدا

مثل ما قلت حق الاخوان في جمعيات خيرية وفي بيت زكاة
بتساعدهم لو كانوا محتاجين صج

والله يعينهم

حياج الله

Maram said...
This comment has been removed by the author.
le Koweit said...

مرام/

الله يعين،

حياج الله،، بس شلون اول مرور للمدونة
انتي اكثر من مرة معلقة عندي :>
ما عليه مضيعة لووول

حياج الله

مرام said...

ويه فشله ... أي و الله مضيعه لوول

قصدي مدونه ثانيه مو مدونتك اسفه
ههههه

تحياتي

le Koweit said...

مرام/


لوووول
لا عادي :)

حياج الله