Pages

@LeKoweit لكل من يود التعليق أو المناقشة حول المقال يسعدني ذلك عبر حسابي على التويتر

Sunday, December 05, 2010

شاهد عيان

الحمدلله، حمداً كثيراً، على الفوز. ألف ألف ألف مبروك لكل كويتي على هذا الفوز، الذي أعاد الكويت إلى سابق عهدها ومجدها، والذي أعاد دماء الفرح في عروقنا.

كفو لكل أبطال الأزرق الكويتي، بيضتوها والله، أبدعتوا وتميزتوا، وأدخلتوا الفرح والسرور إلى قلوبنا.


هذا موضوع. الموضوع الآخر الذي فضلت ألا أكتب عنه حتى يتبين الخيط الأبيض من الخيط الأسود، ونعرف ما الذي حدث بالضبط، هو حادثة ضرب الجويهل.

الجويهل في مقابلة له بعد الإعتداء على قناة سكوب يكذب ويزوّر الحقائق. يقول بأن العم أحمد السعدون عندما علم بالحادثة وقيل له أن الجويهل قد يُقتل بالخارج قال "خلوه يولي ولا لنا شغل فيه وخل نكمل الندوة".

هذا الكلام كذب وافتراء وتزوير على العم أحمد السعدون.

أنا بنفسي كنت حاضر الموقف، وعندما حدثت الحادثة كان العم أحمد السعدون يجلس بجانبنا لا يفصلني عنه سوى مترين تقريباً، وقد أتوا أشخاص مسرعين وأخبروا أحمد السعدون بما يجري بالخارج فقام مهرولاً إلى خارج الديوان، ولم يقل ما نسبه إليه الجويهل.

الجويهل كذلك يقول الذين اعتدوا علي هم سكرتارية فيصل المسلم ومبارك الوعلان. والذين اعتدوا علي مزدوجين. فهل اطّلعت على هوياتهم وأنت تحت الضرب يا الجويهل؟!

بعد كل ما جرى لك، ما زلت تكذب وتزوّر الحقائق، واستغليت هذه الحادثة التي كنت أنت السبب بها لتصوّر للناس أنك مظلوم ومسكين و"تكسر الخاطر".

ما حدث للجويهل خطأ لا ينبغي أن يحصل، نعم بدون شك، وشيء لم نتعود عليه في الكويت. ولكن عندما يكون لدينا في الكويت شخص كالجويهل، لم نتعود على مثله في الكويت، من الطبيعي أن تكون هناك ردات فعل لم نتعود على مثلها في الكويت !


ما أبي أخرّب عليكم فرحة الفوز، لكن والله لم أستطع أن أراه يكذب ويفتري ويزوّر الحقائق بدون أن أتدخل لأشهد شهادة الحق.


وبالنهاية، لا تنسون حضور جلسة مجلس الأمة غداً الأثنين، حضوركم مهم جداً، ودعم للدستور.

27 comments:

Anonymous said...

شاهد عيان لم تضف شيء او حقيقية مهمة

هل بصق الجويهل على صورة مسلم او سكرتارية مسلم تهجموا عليه؟

le Koweit said...

غير معرف/

اعتقد كلامي واضح
انا كنت داخل الديوان
والحادثة صارت خارج الديوان
ما شفته اذا بصق او ما بصق
انا شهدت باللي شفته داخل الديوان

حياك الله

رورو الشخبوطه said...

باجر يبين كلشي..

المهم مبروك الفوز..
وان شاءالله دوم يارب..

le Koweit said...

شخبوطة/

الله يبارك فيج :)
وانشالله دوم فايزين

حياج الله

Anonymous said...

والله انا بصراحه ضد ضرب الجويهل

المفروض مفصخينه ملابسه وهادينه بالشارع بدون ضرب علشان يكسرون عينه

والناس تمشي وراه وتغني هذا هو الموج الازرق لا تطب في بحره تغرق على شرط انهم يحطون كشاف 1.500.000 شمعه عليه

ايوا عمري انت يا الازرق

يبا يا لو كويت انت بكلامك عنه قعد تسوي منه نجم وتكبر من الموضوع وتاخذ وتعطي على ماميش

الكلمه اللي هو يقولها المفروض تقولها له على المتضرر يلجأ للقضاء وخلاص صكر الملف ليش يا لو كويت تاخذ وتعطي بالموضوع مثل هذا وحاط لينك حقه على شنو الحين يبي يصير نقاش ماله داعي , ياما ناس انطقوا وراحوا للمخفر وانتهينا انت ياخوي عدت عليك هذه خصوصا ان اللي جاه كدمات وسحوق على سلامات والله لو صج طاقينه مئات جان الحين هو بالمقبره

وانا ادعوك انك تسوي بوست تحط صورته وهو طايح على الارض وتكتب على المتضرر ان يلجأ للقضاء

من محاسن ضربته انها جت مع كأس الخليج يعني الموضوع راح يموت بروحه تروح انت وتفتحه ليش؟

انت والله طيب يا لو كويت يبيلك دوره في فن اسقاط الخبر مع الزمن يعني بالجهراوي فن اللقمه بفتح اللام
من اهم عوامل نجاح البوست انه يلقم معاك صح وبالتوقيت الصحيح وسلامتك

panadool said...

الزميل العزيز

مبروك للجميع كأس الخليج

بخصوص الندوه

هل أكمل المتحدثون كلامهم وخطابهم وهم يعلمون بأن الجويهل بالخارج يضرب


فى إشاعة ثانية بأن مسلم البراك عندما سمع عن حضور الجويهل توجه للخارج وحث على ضرب الجويهل

هل هذا صحيح


فيدنا أفادك الله


تحياتى يا الخوش

le Koweit said...

غير معرف/

اتفق معاك واختلف معاك
اتفق معاك ان الموضوع ما يستاهل هالضجة
لكن اختلف معاك
اولا اللي صار غلط ولازم نعترف
مهما كنا نكره الجويهل هم اللي صار غلط
ثانيا الموضوع قاعد ينفخون فيه الاعلام الفاسد
وبالتالي انا ما ضفت عليه شي
وانا والله ما كنت ناوي اكتب اي شي عن السالفة
لكن لما قعد يفتري ويكذب ويزور الحقائق
لقيت ان واجب علي اقول الصج خصوصا اني كنت شاهد

هذي كل السالفة يا عزيزي
واحترم رايك :)

حياك الله

le Koweit said...

بنادول/

اثناء الضرب المتحدثين ما كانوا يدرون شقاعد يصير برا
فاستمروا يتحدثون
ولما عرفوا قام بوفتين تكلم بالمايك وحث الحضور على الجلوس
وقالهم يا جماعة صلوا عالنبي وماله داعي
وعيال السعدون ومنظمين الندوة تدخلوا
وانطقوا في سبيل انهم يفكون الجويهل

وعقبها لما وصلت الشرطة تكملت الندوة
يعني توقفت لدقائق معدودة فقط

اما سالفة ان البراك طلع فهذا غير صحيح اساسا
لان الحادثة صارت والبراك يتحدث عالمنبر

وما شهدنا الا بما علمنا :)

وحياك الله يا الخوش

Frankom said...

مبروك الفوز ... ورايتك بيضة

:)

يعني الجويهل طلع طرثوث صغير ؟

le Koweit said...

فرانكوم/

تقدر تقول :)

حياك الله

Anonymous said...

اسمحلي هذا التعليق رد على ردك

انا صاحب التعليق اللي فيه لقمه:)

يا الغالي ترى انا ماقلت ان اللي صار شي صحيح بس اللي حصل ردة فعل طبيعيه

يعني واحد يسئ الى اعراض الناس ويطلع صور الناس المساكين دون احترام لاهاليهم وعيالهم بس لانهم مقدمين على الجناسي ويقول رميليه وطراثيث ومخنثين يعني شتبي يسووله يقولون لو سمحت عندنا سؤال ليش تصفنا بهذه الصفات
مره اخرى ماحدث خطأ ولكن ردة فعل طبيعيه ومتوقعه أساسا الغريب انه ما انطق قبل هالمره يعني جت متاخره

وبعدين انت في ردك علي تقول لازم نعترف ان اللي حصل خطأ واسمحلي اقول لك وانت شكو تعترف , انت وانا يا لو كويت مو في دائرة الاتهام حتى تعترف
انا هذه النبره ماتعجبني من شباب البدو كله يبي يبررون حق الناس الاخرين

واذا على الجويهل انا ابي اعطيك مثال ومثال قوي شوي لنفرض ان ياسر الحبيب مع كل الاحترام للشيعه دخل في محاضره للسلف وقام وسب عائشه شنو تتوقع ردة الفعل اكيد راح توصل الى مد الايد بس انا ماراح اقول ان اللي مدو ايدهم غلطوا راح اقول ان اللي مدوا ايدهم تصرفوا بردة فعل طبيعيه بعد الرجال جاي ويستفز شتبي يسوون لك
اسمحلي على الاطاله ومشكور
لا بس يبيلك تتعلم فن اللقمه

الجودي said...

مبروك الفوز

يا الكويت

:D

le Koweit said...

غير معرف/

هلا فيك مرة ثانية وثالثة وعاشرة بعد :)

انا قلت ان وجود امر غير صحيح وهو الجويهل
راح يتطلب وجود ردة فعل غير صحيحة
واهي اللي صارت امس

ثاني شي
انا لما اقول نعترف انها غلط مو من باب اني بدوي
لا لا
انا اقول نعترف انها غلط عشان نسمي الاشياء باسمائها
وعشان اللي يقرون ما يعتقدون اني مؤيد للشيء اللي صار
لازم ابين موقفي مؤيد او معارض
فهمت علي؟

وانا قلت ان الجويهل اهو اللي تسبب بالمشكلة
لان وجوده في هالندوة وتطاوله على مسلم البراك
طبيعي بيكون ردة الفعل عليها قوية

وبالنهاية، ودي اعرف شسالفة اللقمة هذي
بس اخاف تطلع شي مو زين :P

حياك الله

le Koweit said...

الجودي/

الله يبارك فيج :>
انشالله دون افراح بأفراح

حياج الله

Anonymous said...

محشوم لا والله ما فيها شي موزين

طال عمرك اللقمه هي كلمه تقال عندما تقوم بعمل شئ ويكون مناسب جدا من حيث الزمان والمكان

مثلا عندما يقوم اللاعب بركل الكره بشكل صحيح بنسبه 100% نقول انها لقمة معاه صح

وتقال ايضا عندما تقوم بعمل عشوائي ولكن نتيجته مبهره مثلا لما تشووت الكوره على الله وتروح وتدش تسعين او مقص نقول لقمة معاه صح

اخيرا ما ألومك تسأل وموفاهم هالكلمه بعد مسمي نفسك بالفرنسي لوكويت وينك ووين اللقمه انا اقول شكلك حتى النباطه مامرت عليك بس تعرفها بالنظر بالله عليك هل امتلكت نباطه من ذي قبل؟ وهل افترشت الظهر مثلي بحثا عن رقيعي او اي طائر اخر؟
حلوه افترشت حسيت اني مثل فيروز
:)
وسلامتك يا ملح البلوغات كلهم

bo bader said...

الجويهل أُحْضِرَ ولم يحضر بقصد تخريب الندوة ، ومع الأسف صار اللي كان متوقع !

يوقف بين الآلاف ويسب ويتفل شيتوقع يصير له !

العنف مرفوض لكن التحريض مرفوض من باب أولى .

إذا انت يا جويهل ما تحب لا السعدون ولا فيصل المسلم ولا البراك وتسبهم كل يوم عشرات المرات في برامجك ، شكو تروح ندوتهم وبعدين تقول أمن الحاضرين بالندوة من مسؤولية صاحب البيت !

تحياتي

دستورنا سورنا said...

مبروك فوز منتخب الكويت

Anonymous said...

شرايك باقتراح الوعلان اعطاء المزدوجين فرصة مدتها سنة للاختيار بين الجنسيتين من ناحية قانونية؟
وهل بالامكان تطبيق هذا الاقتراح على قضايا الاغتصاب واللحوم الفاسدة وغيرها من الجرائم؟

Anonymous said...

وبعد ما قام مهرولا خارج الديوان شنو سوي ؟ شقال وشفعل ؟

نمووول said...

اعتقد يا عزيزي لو حتى لو بصق هذا ما يعطي احد الحق بالاعتداء عليه

انا ما اواطن الجويهل
لكن انا ضد الاعتداء
احنا مو عايشين بغابة

------------

مبرووووك للمنتخب ولكل اهل الكويت
قتلك الكاس لنا
ربي لك الحمد

صباحك قشطة

Anonymous said...
This comment has been removed by a blog administrator.
le Koweit said...

غير معرف/

اهاا اوكي اي الحين فهمتها
لووول لقمت وياي :P

بس ترا مرت علينا سوالف النباطات
والقواري بالشوارع
وملاحق الهنود :>

عشت طفولة لا بأس بها لووول

حياك الله

le Koweit said...

بو بدر/

كلامك عدل يابو بدر
اللي حصل متعمد ومتوقع اللي بيصير
والهدف تخريب الندوة
وتضييع السالفة الاهم...

حياك الله

le Koweit said...

دستورنا سورنا/

الله يبارك فيك
:)

حياك الله

le Koweit said...

غير معرف/

مادري شدخل الاقتراح بسالفتنا
وشدخل الاقتراح بقضايا الاغتصاب واللحوم الفاسدة

لكن هالاقتراح غير جيد
المزدوج اذا ثبت ازدواجه
يجب ان تسحب جنسيته فورا
ولا يجب ان يخير
لانه اختار بالفعل

حياك الله

le Koweit said...

غير معرف/

الصراحة ما شفت شنو قال وشنو سوا
لاني مثل ما قلت كنت داخل

لكني حسب ما سمعت
انه حاول الخروج لكن منظمين الندوة منعوه
عشان لا يحوشه طشار من الطق اللي صاير برا

الشاهد من كل هذا
ان الرجال اهتم للموضوع وقام فورا
مو مثل ما ادعى الجويهل عليه

حياك الله

le Koweit said...

نموول/

كلامك عدل
وانا قلت اللي حصل غلط
الطق امر ما تعودنا عليه بالكويت
لكن وجود مثل الجويهل
اللي ما تعودنا عليه بالكويت
راح يؤدي الى وجود ردات فعل ما تعودنا عليها !

الله يبارك فيك :)

حياك الله