Pages

@LeKoweit لكل من يود التعليق أو المناقشة حول المقال يسعدني ذلك عبر حسابي على التويتر

Saturday, January 15, 2011

إرفع الصوت

وصلتني دعوة للمشاركة في فكرة طرحها بعض الشباب، وبعد التفكير، وبعد طرحها على الشباب في "تويتر"، قررت المشاركة في هذه الفكرة، ودعوتكم للمشاركة أيضاً.


الفكرة تقوم على إرسال ايميل إلى أحد منظمات حقوق الإنسان العالمية، وتوضيح ما يحدث بالكويت من انتهاكات لم يسبق لها مثيل لحقوق الإنسان والدستور، لعل الضغط الذي تمارسه هذه المنظمة يكون كفيل بإحراج الحكومة وجعلها تتراجع عما تقوم به. فللأسف أصبح المجلس اليوم بلا فائدة بعد أن اُختطف من قبل البصامة والإنبطاحيين.

الفكرة تقوم على إرسال ايميل باللغة الإنجليزية، تعرض لقضية الدكتور عبيد الوسمي، الكاتب محمد الجاسم، خالد الفضالة، كسجناء رأي سياسي. وعرض قضية المجني عليه محمد المطيري، والتعذيب حتى الموت. ومحاولة إرفاقها بالصور وروابط الفيديو وروابط المقالات الإنجليزية لو وجدت، وأي شيء ممكن أن يدعّم قضيتنا. وأي انتهاكات أخر قامت بها الحكومة.
( منظمة حقوق الإنسان "هيومن رايتس ووتش" في كل من:  شيكاغو chicago@hrw.org , نيويورك hrwpress@hrw.org , باريس paris@hrw.org )

صدقوني يا أخوان، المثل يقول "شحادّك على المر؟ قال اللي أمر منه"، ليس سهلاً أن أشتكي حكومة بلادي لدى منظمات دولية، ولكن السكين بلغت العظم، وبلغ السيل الزبى، هذه الإنتهاكات لم تحصل حتى في دول كنا نعدها دول قمعية أو ديكتاتورية !

إن سكتنا عن هذه السوابق اليوم، فإنها ستتكرر غداّ، وبعد غد، والأسبوع المقبل، إلى أن نعتاد عليها وتعتاد علينا، وبهذا نودع دولة الحريات ودولة الدستور ودولة المؤسسات إلى أبد الآبدين.

قد نادينا لو أسمعنا حياً، ولكن لا حياة لمن ننادي، وكتبنا وتكلمنا وقلنا وخرجنا للشارع، ولكن لا فائدة. إذاً، لا مفر من أن نرفع الصوت، لعله يصل إلى من يساعدنا، أو لعله يزعجهم.

إرفعوا أصواتكم.

30 comments:

ebtsamh said...

فعلا ما يحدك ع المر .. الا الأمر

سدد الله خطاكم

Anonymous said...

اخي المدون الفاضل
أشكرك في البداية على المقال
لكنني لا أوافقك في فكرة رفع الصوت الى المنظمات الحقوقية
لأنه يأخي الفاضل لا نستطيع ان نعترض على ديموقراطية نحن اخترناها
صحيح ان المجلس مبصم للحكومة
ولن يعترض على تجاوزاتها
لذا لابد ان نعترف اننا نحن من اختار هؤلاء الانبطاحيين
وأقصد من كلامي هذا كله ان هذه المنظمات ستستغرب اذا علمت اننا نختار ممثلين لا يسائلون حكمتهم

ودمتم في حفظ الله ورعايته

le Koweit said...

ابتسامة/

اجمعين
مشكورة

حياج الله

le Koweit said...

غير معرف /

اسمحلي اخوي
انا لم اشتكي ان المجلس بصام
انا اشتكي الانتهاكات اللي تقوم فيها الحكومة
صحيح ان المجلس يساعدها
لكن الحكومة اهي اللي انتهكت مو المجلس

واشكرك على رايك
حياك الله

محمد said...

يقولون الصورة ابلغ من الف عبارة
يكفي الصورة اللي حاطها

معبرة جدا

الجودي said...

الكويت اتوقع شنو بتكون الحلول إلي ممكن يعرضونها عليكم أو على الحكومه ؟


ما تتوقع إنهم ممكن يرسلون قوات للكويت في أسوأ الأحوال

بنظري هذه خطوة عواقبها وخيمه و الخوف لا تكون مو محسوبة بالشكل الصحيح تفتحون باب إنتوا بغنى عنه


وربي يحفظنا وياكم و يحفظ لنا الكويت يارب

le Koweit said...

محمد/

فعلا،
وانا ارسلت لهم ايضا رابط الفيديو
واتوقع معبر اكثر

حياك الله

le Koweit said...

الجودي/

يرسلون قوات؟!؟!؟؟
لا لا ويييه

هذي منظمات حقوقية دولية هذي وظيفتها
تركز الضوء على انتهاكات حقوق الانسان في العالم
وسلاحها اهو الاعلام والضغط الاعلامي
وهالشي يحرج الحكومة ويخليها تتراجع

بس
لا قوات ولا هالكلام
:)

حياج الله

whahd1 said...

اايد الفكره والله يوفقكم

Désir said...

بهذي الطريقة بتفتح باب ومسلك لهذي المنظمات انها تتدخل بسياسة الدولة وممكن "تمسك" عالكويت وتحاول تفرض بعض "التدخلات والحقوق " الي ما تتماشى مع عقيدتنا الاسلامية ، اقصد ممكن -على قولتك- يحرجون الدولة إلى حد انها ممكن تزيد من الحريات "الي مالها شغل بالموضوع اصلا" وهذا الي يبونه، اي ثغرة عشان يثبتون انهم صح وبهذي الطريقة يستولون عالنظام الي قاعدين نمشي عليه والبعض لأ
وهذا ما يعني اني ضد الاحداث الي صارت ، بس لو تفكر فيها هذا العذر الي كان يبيه صدام عشان يغزينا .
ولك كل الشكر ، متابعتك اكيد :)

Engineer A said...
This comment has been removed by the author.
Engineer A said...
This comment has been removed by the author.
Engineer A said...
This comment has been removed by the author.
Engineer A said...

يعطيك العافية اخوي لو كويت

والله كلامك صح وانا معاك ان اللي صار شيء مؤسف ومخجل والمفروض ما يصير بديرة مثل ديرتنا .. لكني واسمحلي اقولك ضد الفكرة ..

شوف أخوي الكريم أنا مو ذاك الزود بالأمثال بس بأقول اللي عندي ..

في مثل يقول " انا ولد عمي على الغريب .. وانا واخوي على ولد عمي" اللي صاير بالديرة لازم يظل بالديرة وما يصير يطلع بره

اذا دزينا حق هالمنظمات رسائل وصور وقلنالهم عن اللي قاعد يصير شنو بتتوقع يكون الحل اللي بيقدمونه؟؟ يا اخوي والله بسنا من هالانقسامات .. والله تدري منو اللي قاعد يطري على بالي في هاللحظة؟

اللي غزانا قبل عشرين سنة بحجة ان الكويت تستنجد من الحكومة وبسبب المعارضة! والله لا تشمتون احد فينا واحنا قادرين على حل مشاكلنا ..

انا احياناً جد استغرب من بعض النواب اللي يطالبون باسقاط الحكومة واسقاط رئيس مجلس الوزراء وغيرها شنو اللي يبون يوصلون له؟؟ ولوين يبون يوصلون؟؟

مو كافي حنوا على فصل ولاية العهد عن رئاسة مجلس الأمة وخضعت لهم الدولة وصار اللي يبون .. شيبون بعد؟ يبون يسقطون المحمد علشان يحطون منو بداله؟ واحد منهم؟!

يا اخي الدكتور الوسمي أخطأ بنظر الحكومة وغلط ولازم يتحاسب .. أدري الاسلوب اللي استخدم مرفوض ولكن اهم اللي ما امتثلوا للقوانين وتحدوا القوات .. انا ماني ضد الدكتور الوسمي بس بصراحة ضد هالنواب اللي مادري شلون صايرين بصراحة..

شنو معنى انك تقيم ندوة في بيتك؟ تبي تناقش منو؟ اهم قاعدين يستثيرون الشعب ويستفزون المواطنين .. قاعدين يحاولون يزعزعون الامن بالديرة .. اذا عندك كلمة يا النائب قولها تحت قبة البرلمان مو بره!

أحمد ربي مليون مرة ان من عطوا المرأة الكويتية حقوقها السياسية ما عطيت صوتي لأحد :) لأني بالفعل ما لقيت شخص كوفو والنواب ما قصروا قاعدين يثبتون لي كل يوم هالشي ويأكدون لي صحة قراري!

الخلاصة واعتذر عن الاطالة .. ترا تصعيد الأمر الى هالمنظمات ماراح يزيد الامور الا سوء .. وكافي اللي احنا فيه .. ما نبي نزيد النار حطب !

لذا فأنا مو معاك بهالفكرة .. لأن هالمنظمات بتكون حزتها حققت اللي يبونه بعض الدول .. وبتفتح المجال جدامهم انهم يتغلغلون بمجتمعنا ويتدخلون بشؤنا .. وذيج الساعة يتحقق اللي قاله المعلق الرياضي الوتار وايوون لنا ناس ثانين يغزونا .. واحنا مو ناقصين بلييييز :)

عساك على القوة

Anonymous said...

الصوت ما يرتفع علي الكويت

عشان تحرج الحكومه بتجرح سمعه بلدك

خلافاتنا نحلها بينا واللي يبي يصلح يلقي الطرق والوسائل اذا صلحت النيه

هل ترضي تطلع خصوصيات بيتك للغرب ؟

Reem said...

"هل ترضي تطلع خصوصيات بيتك للغرب ؟"
اللي راضي غسيلنا ينشر للغرب هي الحكومه و إعلامها الفاسد من 3 سنين فاضحينا

و مع هذا أنا ضد اللجوء للمنظمات الأجنبيه

نمووول said...

لو اقتراحك جميل وممكن يكون مؤثر لكن يبيله دراسة محد يدري شنو تبعات مثل هالفعل ؟

انا اقول نرفع صوتنا احنا
وانت والشباب مو مقصرين ترى صوتكم مؤثر وكل يوم تاثيره قاعد يزيد

le Koweit said...

whahd1 /

اشكرك اخوي

حياك الله

le Koweit said...

Désir /

اشكرج على وجهة نظرج
لكن هالمنظمات ماهي سياسية
اهي حقوقية انسانية بالدرجة الاولى
واللي تقوم فيه ماهو تدخل بسياسة الدولة
مجرد ضغط من خلال الاعلام وجذي
يؤدي الى احراج الدولة
بس :)

حياج الله

le Koweit said...

Engineer A /

انتي فتحتي مواضيع كثيرة :)

شوفي
اولا بخصوص المنظمة
هذي مثل ما قلت واكرر
مجرد انها تحرج الحكومة بانتهاكات حقوق الانسان
وعلى فكرة كل الدول فيها هالشي ويصير فيها مثل هالامر ايضا
هذا ماهو سبب للغزو او غيره

ثانيا بخصوص اللي تسويه الحكومة
شوفي يبا
مهما كانت ضخامة الفعل اللي ارتكبه الوسمي
من وجهة نظركم طبعا
ما يعطي الحكومة ولو ربع مبرر للي سوته
احنا المفروض في دولة قانون وهناك محاكم
مو الشرطي بالشارع يحكم وينفذ الحكم
باجر لو اي شخص يخالف قانون المرور ينزله الشرطي يطقه
وللأسف اقولج صارت قبل اسبوعين تقريبا
واحد كان يقحص جان ينزله الشرطي ويطقه وكسر عظامه
هالشي بنظرج عادي؟

بخصوص النواب وندواتهم
هذا حقهم محد ينازعهم فيه
ولا تسمعين حق هالكلام التافه اللي يقول عندكم مجلس ومادري شنو
الديمقراطية ماهي مجلس وبس
الديمقراطية هي مشاركة الشعب في الحكم
واحنا لما نحضر ندوات ونسمع ونعبر عن راينا
هذه اهي الديمقراطية اللي تضيق بها ذرعا الحكومة
الندوات ماهي تهييج للشارع هذي حجة باطلة
الندوات هي مشاركة الامة اللي اهي مصدر السلطات بقضايا الشأن العام

انشالله تكون وصلت الفكرة :)
حياج الله

le Koweit said...

Anonymous /

انا ما جرحت بسمعة بلدي
لما هالشي يوصل برا
الناس راح تقول الكويت قمعية ولا حكومة الكويت قمعية؟
الكويت ظالمة ولا حكومة الكويت ظالمة؟
الكويت تنتهك الدستور ولا حكومة الكويت تنتهك الدستور؟

وبعدين الحكومة لو فعلا حريصة على الصورة
جان احترمت الدستور والقانون والناس
لكنها للاسف مو حريصة

وبالتالي احنا نضطر نلجأ لهذه المنظمات
لحماية حقوقنا وحرياتنا بل وحياتنا !

حياك الله

le Koweit said...

Reem /

احترم وجهة نظرج
لكن انا قلت
اللجوء كان اخر خيار امامنا
بعد ما وصل السكين العظم !

حياج الله

le Koweit said...

نموول/

يا خوي وين بس مؤثر ؟
اذا الحكومة والسلطة مو قاعد ترد على الشعب
وكل يوم تدوس على الدستور والقانون والحريات ؟

اللجوء للمنظمات الدولية ممكن له سلبيات
لكنها بالتأكيد مو مثل ضرب الناس والنواب
وتعذيب انسان حتى الموت !

احترك رايك :)
وحياك الله

Engineer A said...

ومع هذا انا ضد الفكرة واشوف ان الديرة بخير طول ما هالنواب كافين شرهم واذاهم انت تقول اهم يشاركون الشعب ويمثلون الشعب وانا اقولك اهم ما يمثلون كل الشعب.. انا وغيري كثير ما اخترناهم ومع الاسف هالنواب ما يبون الا انهم يشوشرون ويسوون ضجه ويسقطون الحكومة باي شكل من الاشكال

شهالمجلس اللي من بدا كله استجوابات؟

حكومة الكويت لاهي ظالمة ولا قامعة وكل واحد بهالديرة قاعد يتكلم ويقول رأيه بكل حرية والدليل انت قاعد تتكلم بحريتك الحين وتعبر عن رأيك ومحد قاعد يمنعك من هالشي

تدري شنو مشكلتنا اخوي لو كويت؟ ان الشعب انعطى حرية كبيرة اكبر منه ومع الاسف ما احترم هالحرية الممنوحة له ولا قدرها .. الحمدلله احنا اهني في الكويت قاعدين نتكلم ونعبر عن راينا ونقول كل اللي بخاطرنا ومحد مانعنا لا عندنا خوف من حاكم مثل كثير دول ثانية ولا مكتومين ومقهورين على العكس ماخذين راحتنا ومتمتعين بحرياتنا .. عيل لو عايشين بدول ما يقدر الواحد فينا يبطل حلجه ويقول "تلت التلاته كام" !

بعض النواب مع الاسف عامين عيون الناس بكلامهم المأخوذ خيره وحماسهم الزائف على ماميش ومشكلة الشعب يصدق كل شي! يبا هذي سياسة .. كل شي معمول حسابه ومدروس .. صراعات فوق الطاولة ومصافحات تحتها! كل اللي قاعدين يسوونه هالنواب انه يلهونكم عن فشلهم في تقديم اقتراحات للمجلس متعلقة بمشاريع تنموية وغيرها

الشعب ليش مختارهم؟ مو علشان يوصلون رايه للحكومة ويبينون رغبة المواطن بالحصول على افضل خدمة وافضل عيشه؟ بدال ما يشغلون نفسه بتهديد فلان وعلان وبدال ما يضيعون وقتهم بالواسطات والمصالح الشخصية كان من الاولى لهم انهم يشوفون مصلحة الشعب والمواطن وتقديم الافضل لهم والالتفات للقضايا الاسكانية والتعليمية والارتقاء باسلوب الحوار تحت قبة البرلمان مو يسوون لي ندوات في بيوتهم ويجمعون هالناس اللي على باب الله ويشيشونهم على الحكومة ووصل الامر لحد التطاول على الامير هالشي مرفوض

الاسئلة اللي لازم تسألها اهم شنو يبون؟

وين يبون يوصلون؟

طاح الوزير وبعدين؟ راح يأتي وزير آخر مقروود يعاني منهم !

اسقطوا رئيس مجلس الوزرا وبعدين؟ شنو ينتظرون؟ واحد منهم يصير رئيس؟؟

قولي انا كمواطنة شنو استفدت من ندواتهم وكلامهم الفاضي؟ مجرد تأزيم بتأزيم

لا مستشفيات انبنت

لا مطار مثل العالم استوى

لا مشاريع تنموية صارت ولاشي

تبتدي دورة المجلس وتنتهي بدون تحقيق اي اهداف تذكر بالعكس كل مالهم ويكرهوني بشي اسمه نائب اكثر واكثر

اعتذر عن الاطالة بس حبيت اوضح لك وجهة نظري بالموضوع

وشكراً

le Koweit said...

Engineer A /

تدرين شنو المشكلة الصجية؟
اننا فاهمين السالفة غلط
وفاهمين دور المجلس غلط
وفاهمين دور الحكومة غلط

اول شي وقبل كل شي
ترا الحرية اللي عندنا بالكويت ماهي منحة او منة
عشان نقول جزاهم الله خير الحكومة مخلينا
لا هذي حق من حقوقنا وان ما عطونا اياه بالطيب ناخذه بالغصب
هذي كفلها لنا الدستور
ليش دايم تطالعون تحت ؟ نشوف الدول المتخلفة
ليش ما نشوف الدول المتقدمة؟ شلون تبونا نتطور اجل؟
الحرية عندهم مثل الماي والهوا
شي اساسي بحياتهم ماهي كماليات او منه او فضل
وما يقولون احنا مشكلتنا عطونا حرية اكثر من اللازم !
الانسان الحر الكريم ما يعيش بدون حرية
الشيخ عبدالله السالم رحمة الله عليها قال
لا حرية بلا كرامة ولا كرامة بلا حرية
الانسان اللي يعيش بدون حرية ويساق كالغنم
انسان ماله كرامة ولا يستحق العيش

ثاني شي بخصوص المجلس
لحظة لحظة
انتي تقولين ما شفتنا مستشفيات ولا مشاريع ؟!
ترا انتوا فاهمين دور المجلس غلط
المجلس دوره التشريع والرقابة
اما المشاريع هذا شغل الحكومة
المجلس اقر للحومة خطة تنمية ب37 مليار دينار
لو تطبقها الحكومة نتعدى دبي والدوحة وابو ظبي
لكن وين التطبيق؟
كله بوق وفساد وحق فلان وعلنتان
المجلس مو شغلته يبني ويعمر
المجلس شغلته يشرع
والدور الثاني للمجلس اهو الرقابة
ليش ما تبون المجلس يراقب ويحاسب؟
الحكومة تبوق عادي
المجلس يحاسب تأزيم؟
شنو هالتفكير هذا
وفوق هذا جان زين السالفة وقفت عل البوق
الحين صار طق للنواب والمواطنين
وعقبه تعذيب حتى الموت
وكل هذا وما تبون المجلس يحاسب؟
اجل ابي افهم شنو دور المجلس؟
شنو تبون من المجلس؟
منظر بس؟ شكله حلو عالبحر؟

صدقيني انا محتر جدا من كلامج
تدرين ليش؟
لان هالكلام للاسف منتشر بين فئة الشباب
كله غلط بغلط
كذب وتزوير وتضليل يقوم فيه الاعلام الفاسد
وهالكلام انا ابصملج بالعشرة كلام الوطن
للاسف اثرت عليج وعلى كثير من الشباب

سامحيني لو قسيت شي بكلامي
بس والله من حر مافيني

حياج الله

le Koweit said...
This comment has been removed by the author.
le Koweit said...
This comment has been removed by the author.
Anonymous said...
This comment has been removed by a blog administrator.
Engineer A said...

اخوي لو كويت

انا عشت فترة طويلة برا الكويت وبدول متقدمة .. فعلاً اهناك عندهم حريات عندهم تطبيق قوانين ما عندهم نواب يتوسطون لفلان وعلان .. القانون فوق الجميع وفي احترام للقانون وتقديس بشكل كبير ..

بس اهم ما عندهم دين واحنا عندنا دولتنا ولله الحمد معطيتنا حريتنا بالتعبير عن الرأي من غير لا تهديد ولا وعيد ودينا يقول ان طاعة أولي الأمر واجبة حتى لو باقنا!

قال الله تعالى :

{يَا أَيُّهَا الَّذِينَ آمَنُواْ أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ} [ النساء: 59]


قال الرسول صلى الله عليه وسلم

((من أطاعني فقد أطاع الله ومن يعصني فقد عصا الله ومن يطع أميري فقد أطاعني ومن يعص أميري فقد عصاني )) رواه مسلم

وعن ابي هريرة -رضي الله عنه -(( قال قال رسول الله صلى الله عليه وسلم: (( عليك السمع والطاعة في عسرك ويسرك ومنشطك ومكرهك وأثرة عليك )) رواه مسلم ( 1836)

وقال الرسول صلى الله عليه وسلم (( لما سأله رجل :يانبي الله

أرأيت إن قامت علينا أمراء يسألوننا حقهم ويمنعوننا حقنا فما تأمرنا؟ فأعرض عنه ثم سأله فأعرض عنه

ثم سأله في الثالثة فجذبه الأشعث بن قيس فقال صلى الله عليه وسلم (( اسمعوا وأطيعوا

فإنما عليهم ماحملوا وعليكم ماحملتم )) رواه مسلم ( 1846)


وقال النبي صلى الله عليه وسلم في الحديث الذي رواه مسلم

((يكون بعدي أئمة لايهتدون بهداي ولايستنون بسنتي وسيقوم فيهم رجال قلوبهم قلوب الشياطين

في جثمان إنس قال ( حذيفة): قلت : كيف أصنع يارسول الله ؟ إن أدركت ذلك ؟؟

قال : (( تسمع وتطيع وإن ضرب ظهرك وأخذ مالك , فاسمع وأطع ))

رواه البخاري ( 7084) ومسلم ( 1847) باب ( يصبر على أذاهم وتؤدى حقوقهم )

*****

واحنا ولله الحمد حكامنا لا دعونا لمعصية الله ولا افتحوا لنا بارات .. ولا اباحوا الخمر والمسكرات والمخدرات .. ولا نشروا الفحشاء بالديرة على العكس

اهناك في الغرب لما الواحد يفصخ وانت بكرامة - حذاءة- ويحذفة بوجه الرئيس عادي عندهم لأنهم ما عندهم دين

الفساد ياخوي موجود بكل مكان وانا ترى مثلك أطالب بأن احنا ما نقارن أنفسنا بدول أقل منا واحنا كدولة عندنا الامكانيات اللي تخلينا من أفضل الدول وأكثرها تقدم بس المسألة مسألة وقت واذا في تقدمنا انفتاح ينافي دينا فما نبيه ونفضل العيشة اللي عايشينها ونحمد الله مليون مرة على نعمه

ترى شربة الماي البارد بحد ذاتها نعمه ، شلون باللي وعليه عليهم حسرة عليهم كسرة الخبز وشربة الماي؟

أنا برأيي ان نفكر عدل ونشوف الأمور من الناحية الايجابية ولا تشيلون هم السياسة وايد علشان ما ياخذكم الحماس وتعوركم قلوبكم

تأكد ياخوي ان مافي مواطن كويتي يتمنى الأفضل لديرته بس لا نبطر بالنعمة ونحمد ربنا على هالعيشة اللي احنا عايشينها ناس قاعدة في بيوتها ويوصلها راتب .. وغيرها كثير من النعم ولله الحمد يكفي كل واحد وحتى الغريب عنده سقف ينام تحته ولقمة تشبعه ولله الحمد

والنواب اللي تقول عنهم ان من واجبهم يراقبون ويحاسبون اهم بروحهم يبيلهم مراقبة ومحاسبة ولا تنخدع فيهم ترى كلهم طابخينها سوى وأرصدتهم وعقاراتهم الداخلية والخارجية تشهد والله يزيدهم ويبارك لهم بالحلال ويرزقنا مما رزقهم اللهم آمين :))

دمت بخير :)

le Koweit said...

Engineer A /

انا مادري شكو جايبتلي كل هالاحاديث
شدخل ولي الأمر بالسالفة؟
لا تصيرين سكوب لووول

ولي الأمر اهو صاحب السمو
اما رئيس الوزراء ماهو ولي أمر
وبعدين احنا لما نختلف وياه ونطالب برحيله
فكل هذا من خلال الدستور وعن طريقه
يعني ما خرجنا على ولي الأمر
لا تخلطين بين هالأمور
وللاسف هذي من الامور اللي دلس فيهاالاعلام الفاسد على الناس

تقولين عايشين بخير والحمدلله شنبي بعد؟
اول شي الحمدلله احنا ما بطرنا لكن هالشي مو معناته نسكت عن القصور الموجود
والاخطاء والفساد وغيره
ثاني شي
مو معناته ان انا مرتاح وعايش بنعيم خلاص اسكت
شوفي حال البدون شلون عايشين؟
شوفي التعذيب اللي اكتشفناه بوزارة الداخلية؟
شوفي ظلم الواسطات؟
شوفي البوق والنهب من المال العام؟

كل هذا وتقولين الحمدلله
شلون تبين الله يرضى علينا واحنا كل هالبلاوي بديرتنا؟
في قصة من قصص بني اسرائيل ناسيها
المهم الزبدة ان الله قطع عنهم المطر لان فيهم واحد عاصي

فما بالج احنا عاد؟ ديرتنا فيها كل هالبلاوي
وتبين نسكت؟

الاعضاء ماهم ملائكة
فيهم الشين وفيهم الزين حالهم من حال البشر
وابشرج الشين اكثر من الزين
لكن المشكلة الأكبر اهي من الحكومة....

:)
وحياج الله